Día do lector

O venres, 3 de novembro, conmemoramos o Día do Lector en memoria de Xosé Neira Vilas, nado un día coma este do ano 1928 en Gres, no concello de Vila de Cruces. O académico é autor dunha das obras máis lidas das #letrasgalegas, 'Memorias dun neno labrego', editada por primeira vez na Arxentina (1961).

Para celebralo, dende os diferentes equipos, realizamos unha divertida e interesante proposta co  propósito de animar ao alumnado a coñecer o noso patrimonio literario e espertar nel o interese  pola lectura.

     

Lectura dun fragmento do libro "Memorias dun neno labrego" realizada por Alberto e Marco.

Sorteo público  o  día 3/11/2023 ás 12:40 h.

Sorte!!

                           

Rosco: Xosé Neira Vilas

As preguntas deste rosco, desde o A ao Z, coas súas respostas, foi unha proposta do alumnado de todos os cursos de Educación Infantil e Educación Primaria  do CEIP Xoaquín Loriga. Parabéns por este traballo tan interesante e co que aprendemos moito.

Reto II. Anímate a resolver este rosco e non esquezas contabilizar o tempo empregado.

                     Comezamos!

 

Esta é a proposta realizada polo alumnado do centro.

Nesta semana conmemoramos o Día das Bibliotecas, coincidindo ademais co Día Internacional contra o Cambio Climático, para esta ocasión contamos coa colaboración de Miguel Agulló Canda, axente forestal do Distrito  Forestal XVI do Deza- Tabeirós. Miguel informounos sobre a necesidade de coidar e valorar as nosas especies, tanto a flora como  a fauna. As razas autóctonas aguantan as condicións climáticas da nosa zona, a chuvia, o frío, as características do terreno...Non existen fronteiras para a fauna, móvese dun lugar a outro, en función das súas necesidades, non podemos dicir que sexan exclusivas da nosa contorna. Os paxaros cando migran realizan un gran esforzo para sobrevoar longos traxectos, loitando contra o vento, a chuvia e a calor, necesitan estar sans e con estes desplazamentos veñen cargados de información para nós. O cambio climático está afectando e  confundindo aos animais e ás plantas. As estacións están modificadas, xa non son as de sempre, o mar está "enfadado", atrapa a calor e xa non a solta, esto provoca un cambio nas nubes e, polo tanto, un desxeo dos polos.

É necesario mudar as nosas prácticas de sobreexplotación dos recursos terrestres, xa que estamos poñendo en perigo a nosa propia existencia. 

Despois do parladoiro instructivo distribuímos unha bolsa con agasallos para cada curso, que contiña: un libro informativo, unhas sementes de árbores autóctonas para plantar e o cartel identificador do bancal da horta feito en madeira. Recordouse que cada clase, a partir deste momento, tiña que investigar sobre un tema medioambiental concreto, relacionado co proxecto de centro, para posteriormente elaborar un traballo escrito e gráfico que despois deberán explicar ao resto do alumnado do centro a partir do segundo trimestre.

A relación dos temas  pora cada cursos será a seguinte:

• Infantil: os mamíferos.
• 1º de primaria: as aves.
• 2º de primaria: os réptiles.
• 3º de primaria: os anfibios.
• 4º de primaria: os peixes.
• 5º de primaria: os invertebrados.
• 6º de primaria: as plantas.

O DÍA DAS ESCRITORAS vénse celebrando desde o ano 2016 para reivindicar o labor e o legado das escritoras ao longo da historia. Cada ano, esta celebración lévase a cabo o luns máis próximo á festividade de Teresa de Jesús, o 15 de outubro. Este ano, no CEIP Xoaquín Loriga, conmemoramos esta data para poñer en valor o legado literario das mulleres, tantas veces esquecidas e relegadas a un segundo plano ao longo da historia. Mulleres valentes cuxa obra, en moitas ocasións, foi ignorada. Rescatar a súa voz é un acto de xustiza e recoñecemento cara a todas elas. Esa é a razón de que hoxe esteamos aquí, na nosa biblioteca, para dar visibilidade á obra de todas as escritoras e máis en profundidade as escritoras en lingua galega, xa que a escrita, dende todos os tempos, tamén ten nome de muller. Queremos enxalzar e apoiar o papel da muller na literatura e na nosa lingua. Rematamos con estes versos de Luísa Villalta , a quen se lle dedica o Día das Letras Galegas 2024.

 “Onde nós non hai nunca outro destino

 que ser un anónimo fin

ou un glorioso comezo"

Dende o CEIP Xoaquín Loriga reclamamos un comezo glorioso, que non sexa anónimo e que a muller pronuncie o seu nome. 

Para festexar esta data tivemos o privilexio de contar coa desinteresada colaboración de Charo Golmar.  Escritora lalinense, autora de libros de poemas como "Nobelo de Luz" e "No bico do vento", co que estivemos a traballar nestas derradeiras semanas, xunto con outros libros de escritoras en lingua galega. Charo Golmar é muller,  exalumna do centro, mestra e  unha gran sedutora de palabras que, con interesante mensaxe e fondas reflexións, conquistou o noso corazón e foi quen de comunicar o sentir de todas as mulleres escritoras que se dedican a esta bonita profesión. Un pracer contar coa túa amable presenza, Charo. Moitas grazas por compartir con todos e todas un pouquiño do teu tempo.

De xeito colectivo,  todo o alumnado do centro  afondou no estudo sobre a vida e a obra destas escritoras, segundo se recolle na seguinte imaxe.

Con este bonito vídeo  presentan parte do seu traballiño.

Vídeo realizado polo alumnado do centro

Feliz Día das Escritoras!! 

Estamos de volta na biblioteca escolar

Bo día familias!

Este ano escollemos como temática da biblioteca o lema "A defensa das nosas especies: o noso mellor legado" en colaboración co proxecto de Voz Natura. Todas as actividades e conmemoracións que se celebren no centro xirarán en torno a temáticas medioambientais e a defensa das especies animais, a flora e a fauna.

O día 27 de outubro farase a reapertura da biblioteca escolar cunha charla informativa sobre o medioambiente. A partir dese momento cada grupo traballará un tema diferente: plantas, invertebrados, peixes, anfibios, réptiles, aves e mamíferos a través de exposicións orais, escritas e visuais.

Previamente a esta reapertura, o día 16 de outubro celebraremos o día das escritoras cun encontro literario coa escritora local Charo Golmar, que virá a presentarnos o seu libro de poemas "No bico do vento".

Taller Revitaliza Educación Infantil

 Ao longo do mes de novembro desenvolveranse no noso centro as actividades do Programa Revitaliza de compostaxe da Deputación de Pontevedra e o CEIDA. O programa consta de xornadas de formación para o profesorado, charlas, obradoiros e exposicións. O obxectivo deste plan é difundir a compostaxe entre os nenos e nenas dos centros escolares para concienciar sobre a necesidade de tratar o lixo de forma sostible e formalos para que respecten o  Medio Ambiente. 

Este taller ía dirixido ao alumnado de 5º e 6º de infantil, levaba por título "A tribo dos Ecobechos". Con esta proposta aprendemos o proceso de elaboración do compost  e os bichiños que trituran a materia orgánica para axudar a coidar a nosa terra.